Quba Rayonunda Beynəlxalq Əlillər Günü Münasibətilə Tədbir Keçirilib

3 dekabr 2024-cü il tarixində Quba-Xaçmaz Regional Təhsil İdarəsi və Quba Uşaq-Gənclər İnkişaf Mərkəzinin təşkilatçılığı ilə Beynəlxalq Əlillər Günü münasibətilə tədbir keçirilib. Tədbir, sağlamlıq imkanları məhdud olan insanların cəmiyyətə inteqrasiyasını dəstəkləmək və onlara göstərilən diqqət və qayğını vurğulamaq məqsədini daşıyırdı.

Tədbirdə Quba Rayon İcra Hakimiyyəti başçısının müavini, Quba-Xaçmaz Regional Təhsil İdarəsinin Tədrisin Keyfiyyəti Sektorunun müdiri, Quba Uşaq-Gənclər İnkişaf Mərkəzinin rəhbəri və Quba-Xaçmaz Regional Təhsil İdarəsinin tabeliyindəki ümumi təhsil müəssisələrində inklüziv siniflərdə təhsil alan sağlamlıq imkanları məhdud şagirdlər iştirak ediblər.

Tədbirdə çıxış edən Quba Rayon İcra Hakimiyyəti başçısının müavini Səidə Abbasova və Quba-Xaçmaz Regional Təhsil İdarəsinin Tədrisin Keyfiyyəti Sektorunun müdiri, Aymurə Dadaşova, bu günün əhəmiyyətindən, ölkəmizdə sağlamlıq imkanları məhdud şagirdlərə göstərilən diqqət və qayğıdan bəhs ediblər. Onlar, Azərbaycanın müxtəlif sahələrdə əlilliyi olan şəxslərə verdiyi dəstəyi və onların cəmiyyətə inteqrasiyasını təmin etmək üçün həyata keçirilən layihələrə diqqət çəkiblər.

Tədbirin ardından, Quba Uşaq-Gənclər İnkişaf Mərkəzinin dərnək üzvləri tərəfindən rəqs və musiqi nömrələri nümayiş olunub. Əyləncəli və rəngarəng proqram, tədbir iştirakçılarına xoş anlar yaşadıb.

#MÜTDA #EduAz #QubaXaçmazRTİ